Paghatag og authority ni Tomas gikwestiyon

CEBU, Philippines — Gikwestiyon sa mga miyembro sa oposisyon sa konseho sa Dakbayan sa Sugbo ang resolusyon nga mo-authorize kang Mayor Tomas Osmeña nga mopirma og Memorandum of Agreement (MOA) tali sa Angkas.

Si Konsehal Jose Daluz, III nagkanayon nga ilegal kon ang siyudad mo-regulate sa operasyon sa Angkas.

Samtang si Konsehal Pastor Alcover nagkanayon kinahanglang unahon ang mga yanong drayber sa habal-habal usa ang Angkas nga usa ka pribadong kompaniya.

Matud ni Alcover nga niduso siya og ordinansa nga mo-regulate sa operasyon sa habal-habal sa siyudad apan wala kini maaprobahan sa komitiba sa konseho tungod kay walay national nga balaod nga nagsuporta niini ug walay nagtugot sa siyudad nga mo-regulate sa habal-habal.

Gikwestiyon ni Alcover ang maong kontrata tungod kay sama kini sa nisuporta sa usa ka kompaniya.

Sa iyang bahin, si Konsehal Eugenio Gabuya niangkon nga ilegal ang habal-hubal tungod kay wala pay balaod nga nisuporta niini apan gi-tolerate kini sa siyudad tungod kay naghatag kini og serbisyo ngadto sa katawhan.

Dugang niya nga ang MOA sa Angkas ang mo-systematize sa kasamtangang operasyon sa habal-habal.  Si Konsehal Alvin Arcilla ang nangamahan sa resolusyon nga magtugot kang Osmeña nga mopirma sa kontrata.

Ug tungod sa daghang pangutana gi-defer una sa konseho ang pagpalabang sa maong resolusyon aron matuki ang ubang mga isyu niini. (/BDB)(BANATNEWS)