Sa Tanke: Daghang nalipay, daghan sab ang naguol

CEBU, Philippines — Daghan ang nalipay apan aduna sa’y nakulban sa kaldero. Kini maoy gitug-an ni Kapitan Nelson Cabanes sa Barangay Tanke, Siyudad sa Talisay.

Matud pa ni Cabanes nga nindot nga pulong ang iyang nadunggan sa dihang naabot sa ilang barangay ang mga sakop sa Regional Mobile Force Battalion (RMFB).

Apan nakadungog sab siya nga adunay mga residente kinsa nalambigit sa ginadiling drugas ang nagbagolbol kay nakulban sila og kaldero human maapektuhi ang ilang ilegal nga negosyo.

Ang RMFB naabot niadtong Agusto 3 subay sa hangyo sa mga opisyales sa barangay ngadto ni Police Regional Office (PRO-7) direktor Chief Supt. Debold Sinas. Sukad sa pag-abot sa RMFB-7, walay puas ang ilang pagdakop sa mga tawong ilegalista.

Dako sab ang pasalamat ni Cabanes kay nabati na gyud sa mga ilegalista ang kahadlok human gipatuman ang  hugot nga kampanya sa tanang matang sa ilegal. Hangyo lang niya sa kapolisan nga unta dili abusaran sa kapolisan ang ilang gahum.

“Kung sad-an o adunay gibuhat nga ilegal dakpon dili kay dapatan,” dugang pa ni Cabanes.

Sa nasayran, gipasanginlan ang RMFB nga nanunog og panimay sa giilang mga ilegalista sa lugar ug nanagmal og lalaking hubog pipila ka adlaw ang milabay. (/DILT)(BANATNEWS)