Nubain queen nasikop

CEBU, Philippines — Sakop sa LGBT nga gianggaan og Nubain Queen ug mga kauban ang nasikop sa mga tinugyanan sa Abellana Police Station (CCPO Station 2) sud sa dormitel nga nahimutang sa may N. Bacalso, Ave., Brgy. Sambag 2, niadtong Biyernes sa gabii.

Ang Nubain Queen mao si Louei Goopio ug ang iyang mga kauban mao sila si Gerald Amador, John Rey Molinio ug Albert Coguia, pulos hingkod ang panuigon.

Mipahigayon og buy- bust ang kapolisan uban sa pakig-alayon sa PDEA-7 ug ubos sa direkta ni Atty. Maria Theresa Macatangay, hepe sa naasoy ng police station human sila makadawat og information labot sa transaksyon sa   nubain.

Human nagpositibo ang buy-bust nakuha gikan sa mga dinakpan ang 540 ka mga ampule sa nubain nga mobalor og dul-an sa P138 mil.

Base sa pakisusi sa kapolisan, nasuta nga ang subject nga si Goopio nalakip sa ten priority target list sa Parian Police Station ug high value target sa City Drug Enforcement Unit matud pa ni PCIns. Kenneth Albotra.

Ang mga dinakpan tak-om pa ug wala mohatag og mga pamahayag, samtang ang kapolisan mohimo pa og dugang imbestigasyon kon giunsa pagbaton ni Goopio sa maong gidaghanon sa nubain.

Sumala pa ni Macatangay, mga parokyano ni Goopio ang mga nagtrabaho sa bar, habal-habal driver ug uban pa, diin miadto siya sa maong dormitel aron ihatod ang mga nubain ampules.

Samtang siyam ka tawo ang nasikop sa mga sakop sa Lapu-Lapu City Police Office (LLCPO) nga pulos gikatahapang drug pusher.

Laing nadakpan mao ang duha ka motorista nga milabay sa checkpoint sa may dalan M. Logarta sa Barangay Subangdaku, Dakbayan sa Mandaue pasado alas 10 sa miaging gabii.

Ang Presinto 2 sa Mandaue City Police Office maoy nakadakop nila ni James Mateo  Pascual, taga Poblacion, Liloan ug Franklin Paredes Patinio, nga taga Bohol. Nakuhaan sila og lima ka gagmay’ng pakete sa gituohang shabu. (Romeo T. Limpangog/DILT)(BANATNEWS)