Boatman sa Oslob ni-top sa board exam

CEBU, Philippines — Nibarug isip amahan sa ilang pamilya ang 22-anyos kinsa nasulod sa top 10 sa electrical engineering licensure exam.

Si Mark Rene Trapila nag-inusarang graduate sa Sugbo ang ni-top sa nahisgutang board exam niadtong September, 2018 samtang adunay laing duha nga naka-top sa master electrician board exam.

Naswertehan siya nga nakadawat og scholarship grant gikan sa Department of Science and Technology (DOST) sa pagsulod niya sa kolehiyo diha sa Cebu Technological University (CTU).

Gibutyag ni Trapila nga pagtungtong niya og third year level sa kolehiyo nasakit ang iyang amahan ug gilaygay sulod sa walo ka buwan.

Si Trapila nga taga Lungsod sa Oslob nipuli sa trabaho sa iyang amahan isip boatman sa inila nga whale shark watching sa ilang lugar.

Nahimo niyang routine nga mo eskwela sa weekdays sa siyudad sa Sugbo ug mag-ulian sa tapos sa semana aron mogiya sa mga turista bisan pa sa naglagiting nga init.

Ang iyang inahan usab nagtikad kini og umahan aron makaabag usab sa  panginahanglanon sa pag-eskwela sa laing pito niya nga igsuon.

Dihang graduating na si Trapila sa iyang kurso nitaliwan ngadto sa laing kalibutan ang iyang amahan. Nahuman niya ang bachelor’s degree sa electrical engineering niadtong Abril nga nakakuha og honors isip magna cum laude.

Si Trapila nagpadayon nga nagtrabaho sa Oslob human sa graduation ug samtang nisulod kini og review class alang sa board exam.

Nakurat na lang siya nga gisugat og mga pagbati sa iyang mga higala niadtong Huwebes diin nipagawas ang Professional Regulation Commission sa resulta sa pasulit. Si Trapila nitungtong sa rank 9 nga nakakuha og score nga 90.05 percent.

Sa sunod nga adlaw sa Septiyembre 3 nisunod ang board exam alang sa mga master electrician. Si Janito Salipdan, Jr. gikan sa Cebu Technological University - Tuburan Campus nasulod sa rank 9 samtang si Jhonielhu Caluña gikan sa University of Cebu nilandig sa 10th place. (/BDB)(BANATNEWS)