Cebu City nigahin og P102M sa seafood market ug drainage

CEBU, Philippines — Ang kagamhanan sa Dakbayan sa Sugbo magtukod og bag-ong seafood market ug panindoton usab ang karaan nga Pasil Fish Port diin tumong niini nga mamahimong bag-ong tourist spot ang maong lugar.

Si Kongresista Bebot Abellanosa sa ikaduhang distrito sa Sugbo nagkanayon nga i-modernized na ang Pasil Fish Port ug maghimo og lain pang seafood market diha sa Pasil.

Usa sa ipatuman nga modernization sa fish port mao ang pagpaayo sa seawall ug pagpatukod og boardwalk alang sa mga gustong mobisita kinsa layoan ngadto sa Naga City Boardwalk.

Gituyo ang pagpanindot sa Pasil Fish Port aron nga ang mga turista lakip ang mga Sugbuanon dili na mahadlok nga mobisita sa maong dapit.

Matud ni Abellanosa nga mo-provide sila og pilot drainage diha sa tunga sa dalan sa Barangay Suba ug Sawang Calero.

Ang maong drainage lapad kini ug magsilbing artery gikan sa drainage systems sa mga barangay sa ibabaw’ng bahin  paingon ngadto sa dagat.

Ang kagamhanan sa siyudad nigahin og P80 milyones alang sa drainage system ug P22 milyones alang sa sea food market lakip na niini ang pagpanindot sa Pasil Fish Port ug gikatakdang pun-an og laing P50 milyones sa sunod tuig ang maong pundo. Karong tuiga gikatakda na ang construction sa proyekto.

Gilauman nga dugang pamilya nga nagpuyo sa lugar ang mahatagan og panginabuhian sama sa pagpamaligya og souvenir items.

Giingong ang lugar butangan usab kini og parking area aron dunay maparadahan sa ilang mga sakyanan ang mga mobisita unya sa lugar. Richel Ann P. Basiga (BANAT NEWS)