Pasil Fish Market palambuon, paninduton

CEBU, Philippines — Gipaabot nga i-develop sa kagamhanan sa Dakbayan sa Sugbo ang Pasil Fish Market pinaagi sa pagbutang og boardwalk ug seafood restaurants. Nagkanayon si Konsehal Joy Augustus Young nga ang City Planning and Development Office naghimo na sa Program of Works and Estimates (POWE) aron makahibawo sila kung pilay kinahanglan gastuhon.

“At first the mayor is thinking for the city but Congressman Rodrigo Abellanosa volunteered to get funding from the national, so gi-arrange pa na,” matud ni Young.

Nitumaw ang hisgutanan human si Young nag-post sa iyang Facebook account nagpahibawo sa proposed project sa siyudad.

Gani gisuportahan kini sa hulagway sa plano ug kung unsay hitsura sa proyekto.

Matud niya nga dili kini ang unang higayon nga ang kasamtangang administrasyon nagtinguha sa pagpalambo sa Pasil Fish Market aron mahimong mas nindot tan-awon sa mga turista.

Bisan sa mga nangaging katuigan diin si Mayor Tomas Osmeña nilingkod isip chief executive sa siyudad, ang proyekto naplano na daan apan gumikan sa kahagip-ot sa budget wala kini nahinayon.

Apan karon si Young malaumon nga ang kalambuan makita sunod tuig.

“Ang ground floor fish market na for wholesale and ang second floor boardwalk na and ang atubangan restaurant,” dugang sa konsehal. Nakita ni Young nga kinahanglan palambuon ang Pasil Fish Market aron pagtabang sa mga residente nga makakwarta. (BANAT NEWS)