Mahiligon sa sports nakoronahang Renaissance Cebuana

CEBU, Philippines — Usa  ka sports enthusiast ang nakoronahan nga labing unang AAA Renaissance Cebuana sa Lalawigan sa Sugbo. Si Katherine Jumapao, 26-anyos, taga Lungsod sa Liloan maoy napili gikan sa 15 ka kandidata nga nakaabot sa final stage sa pagpili sa Renaissance Cebuana.

Si Jumapao kinsa nag-inusarang anak ni Konsehal Ferdinand Jumapao sa Liloan mahilig sa sports sama sa volleyball ug buot niining makatabang sa pag-promote sa women empowerment pinaagi sa iyang kahilig sa paugnat sa kusog. Si Jumapao nagkanayon nga isip ambassadress sa Provincial Women’s Commission (PWC) buot niyang mo tutok sa programa sa edukasyon pinaagi sa sports ngadto sa kabatan-onan hilabina sa mga babaye.

Matud niya bisan didto sa ilang lungsod nagtudlo na siya sa mga bata nga nag-edad gikan sa 5-anyos ngadto sa 9-anyos sa basic sa volleyball ug basketball ug ang mga 10-anyos ngadto sa 15-anyos gitudloan og advance skills training sa maong sports.

Si Jumapao nagkanayon nga lahi ang hagit sa ilang pag-apil sa maong pageant, sanglit dili kini sama sa ubang beauty pageant.

Sa AAA Renaissance Cebuana kinahanglan moagi sa fun run, hangtod na quiz bowl ug ang talent night lakip na sa question and answer atol sa coronation night niadtong Biyernes sa gabii diha sa Capitol Social Hall.

Ang AAA (Athletic-Academic-Artistic) Renaissance Cebuana giumol kini sa PWC nga gipangulohan ni Bise Gobernador Agnes Magpale pag-promote sa women empowerment sa Lalawigan sa Sugbo. (/BDB)(BANATNEWS)