Doktor wala magdahom nga mahatagan og award sa RAFI

CEBU, Philippines — Wala magdahom ang usa ka doktor nga sa iyang pagtabang sa mga bungi nakita ang mao niyang gihimo ug nahatagan siya niini og pasidungog. Si Dr. Benedict Edward Valdez usa ka trauma surgeon ang napiling awardee sa Ramon Aboitiz Award for Exemplary Individual sa ika-7th RAFI Triennial Award.

Si Valdez maoy presidente sa Maharlika Charity Foundation, Inc. sa Dakbayan sa Davao.

Dili moubos sa 1, 500 ka pasyente nga bungi ang natabangan ni Valdez nga mabalik ang ilang maanindot nga katawa sukad niadtong tuig 2009.

Lakip sa napili nga mga finalist uban ni Valdez mao ang Person With Disability (PWD) nga si Mateo  Quilas sa Bohol, Norlan Pagal, usa ka mananagat sa Lungsod sa San Remegio, Dr. Sara Cubar, usa ka magtutudlo sa Davao del Norte ug Roel Cagape usa ka missionary doctor sa Sarangani.

Samtang ang Philippine Eagle Foundation (PEF) maoy nakakuha usab sa Eduardo Aboitiz Award for Outstanding Institutions gikan sa upat ka finalist.

Si Dr. Jayon Ibañez, PEF director sa research and conversation nagkanayon nga gipahinungod ang award ngadto sa mga kauban nila sa upland communities nga kasagaran mga kabus.

Ang PEF naka-organized na kini og 700 ka mga lokal nga forest guards nga nagbantay sa mga agila.

Si Dr. Valdez ug ang PEF pareho kining nakadawat og P500,000 nga cash award samtang ang uban finalist nakadawat usab og tag P200,000.

Ang Triennial Award sa RAFI nalusad kini niadtong buwan sa Hulyo, tuig 1996 paghatag kini og pasidungog ngadto sa mga institution ug indibiduwal nga naghatag og kaayohan sa ilang komunidad. (/BDB)(BANATNEWS)