Pari gipangita, patyonon

CEBU, Philippines – Hinabion sa chaplain sa Police Regional Office-7 ang pari nga nangangkong dunay hulga sa kinabuhi gumikan sa iyang pagsaway sa mga pagpamatay ubos sa administrasyon ni Presidente Rodrigo Duterte.

Matud ni PRO-7 Director Debold Sinas nga si Police Supt. Raynaldo Piañar ang ilang tahasan sa pagpakig-estorya kang Fr. Amado Picardal.

“Dili ko magpadala didto og polis kay threat siya didto basig kami pay kuan unya, gipadala nako akong pari pud para silay magkasinabot then they will talk kung unsa gyud ang iyahang threat kay bigla lang siyang nag-announce nga nakuan siya sa EJK, wala man mi kabalo, so we would like to assist him whether kung unsay mahitabo niya, problema sad baya na namo,” matud ni Sinas.

Nanghinaut si Sinas nga mosalig si Picardal kang Piañar sanglit pareho sila nga mga pari.

Si Picardal nga pari sa Redemptorist nibutyag pinaagi sa iyang blog post nga aduna siyay nadawat nga mga impormasyon nga siya ang sunod nga target sa Davao Death Squad nunot sa iyang protesta batok sa extrajudicial killings ubos sa administrasyong Duterte ug sukad pa niadtong nadestino siya sa Davao diin mayor pa si Duterte.

Matud niya nga kapin 20 ka tuig na siya nga nagsuwat ug nagsangyaw batok sa maong isyu.

Gisuwat sab niya nga sukad 2017 aduna na siyay nadawat nga mga impormasyon nga usa siya sa mga patyonon sa death squad.

Karong tuiga, giingong tulo na ka higayon  nga giingnan siya sa guwardiya ug hardenero sa Redemptorist Monastery nga adunay mga lalaki nga nag-full faced helmet sakay sa motorsiklo ang nangita kaniya.

Matud ni Sinas nga walay pormal nga sumbong nga nadawat ang Cebu City Police Office gikan sa maong pari apan iyang gitataw nga abli ang ilang buhatan kun makig-alayon ang maong pari kanila ingon man ang paghatag og seguridad kun mosugot kini.

“If he’s willing to discuss, then we will discuss. We will make some arrangement sa iyaha,” dugang ni Sinas. (/GMR)(BANAT NEWS)