Kapolisan sa Talisay gidayeg sa homeowners

CEBU, Philippines – Gidad-an og plake ug cake sa Homeowners Association ang kapolisan sa Dakbayan sa Talisay niadtong Martes sa buntag.

Kini human ang grupo nakauyon sa ilang gipakitang katakus sa ilang trabaho.

Si Superintendent Marlu Conag, hepe sa kapolisan sa maong siyudad nagkanayon nga nalipay ang kadagkuan sa mga residente sa Vista Grande sa Barangay Bulacao gumikan sa sunod-sunod nilang paghipos sa mga tawong malapason sa balaud.

Gibutyag ni Conag nga usa ka Rodel Patikan ang ilang napatay human nisukol samtang bitbit nila ang warrant of arrest niini sa milabay’ng buwan.

Nasayran nga si Patikan giingong maoy notadong kawatan diha sa Vista Grande nga gireklamo na sa mga residente sa lugar.

Gani sa pagpatawag sa Barangay Bulacao kang Patikan mao pa kini ang giingong isog kaayo ug mangatang sa mga nagpuyo sa lugar diha sa gate sa subdivision ug mang-harass.

Nagkanayon si Conag nga nalipay lang ang grupo sa residente sa ilang nahimo ug wala usab nila kini damha.

Dugang ni Conag nga nibuhat lang sila sa ilang trabaho ug nakit-an sa mga tawo ang ilang kahago hinungdan nga nisaka usab ang ilang moral. (/BDB)(BANAT NEWS)