Lima ka oras nga traffic sa Mactan Bridge
CEBU, Philippines – Lima ka oras nga natanggong sa traffic ang mga sakyanan diha sa Mandaue-Mactan Bridge sa habig sa Barangay Pajo, Lapu-Lapu City tungod sa panagbangga sa tulo ka mga sakyanan kagahapon sa buntag.
Matud pa ni Police Officer 2 Jomar Florentino, imbestigador sa Traffic Enforcement Unit of Lapu-Lapu City Police Office (LCPO) usa sa mga nalambigit nga sakyanan ang mi-counterflow sa kasugat nga lane hinungdan sa maong insidente.
Tungod niini, si Chief Inspector Jimmy Fortes, hepe sa LCPO-TEU mimando sa pag-divert sa tanang mga sakyanan padung sa ikaduhang taytayan sa Marcelo Fernan Bridge.
Base sa pasiunang imbestigasyon si Arnold Lim Siao, 37, taga Greenhills Subdivision, Barangay Cabangcalan nga nagmaneho og Toyota Vios nitabok sa taytayan padung sa Mandaue City sayo sa kaadlawon.
Matud pa nga si Siao mi counter-flow ug nisulod sa double yellow boundary line.
Matud ni Florentino tungod niini naigo niini ang usa ka Mazda pickup nga gimaneho ni Deolito Lequigan Pinote, 47, ug ngadto sa nagsunod kang Pinote nga usa ka Honda sedan nga gimaneho usab ni Danilo Olmoguez. Ang duha padung sa Lapu-Lapu City.
Wala hinuoy nangaangol sa maong aksidente apan naguba ang ilang mga sakyanan. Alas 9 na sa buntag nakuha ang mga sakyanan nga nalambigit sa aksidente ug gidala sa impounding area sa LCPO.
Si Siao gikustodiya sa kapolisan samtang gipaabot pa ang sabot-sabot nila sa tag-iya sa ubang sakyanan. Kasong reckless imprudence resulting to multiple damages ang planong ipasaka sa kapolisan matud pa ni Florentino. (Gikan sa The Freeman/IBM) (BANAT NEWS)
- Latest
