Dalagita gituohang gilugos gipatay

CEBU, Philippines – Hapit na madugta ang patay’ng lawas sa usa ka 15 anyos nga batang babaye nga napalgan diha daplin sa usa ka fishpond sa Sitio San Miguel, Barangay Owak, lungsod sa Asturias niadtong Lunes sa hapon.

Wala nay sapot ang lawas sa biktima nga gituohang gilugos ayha pa kini gipatay. Ang biktima giila sa kapolisan nga si Jenebeve Entenado, residente sa Sitio Tabay Daantao, sa Barangay Poblacion sa maong lungsod.

Sa blotter report sa Asturias Police Station, duha ka mga residente sa sitio San Miguel ang misumbong sa kapolisan nga aduna silay napalgang patay’ng lawas sa maong hilit nga lugar.

Si Police Chief Inspector Roger Quijano, hepe sa Asturias Police nagkanayon nga sa inisyal nga pakisusi gidudahan nilang gilugos ang  biktima.

Wala na kini mga sapot ug aduna sab kini mga bun-og sa lawas nga timailhang misuway kini og sukol sa mga mamumuno.

Pagbana-bana sa polis nga duha ngadto sa tulo ka mga tawo ang mibuhat sa maong krimen sanglit nagdupa na ang maong patay’ng lawas diin posibleng adunay naghupot sa iyang mga kamot.

Sa pagsubay sa mga imbestigador, katapusang nakit-ang buhi si Entenado  niadto pang Agosto 24 sa alas-2 sa kaadlawon, adlaw’ng Biyernes atol sa disko sa Sitio Anapog sa maong barangay nga nagsaulog sa kapistahan didto.

Apan bisan og na-missing na kini niadto pang adlawa giingong wala nagpa-blotter ang pamilya niini.

“Iyang ginikanan naninda man sa diskohan, naa sad siyay mga cousin ug mga barkada nga naa sad sa diskohan pero wala gyuy nakabantay ani (ang biktima) kay nawala ra daw ni og kalit kuyog atong usa ka lalaki,” butyag sa maong hepe.

Dugang ni Quijano nga adunay nakakita kon kinsa ang katapusang kuyog sa biktima sa maong diskohan nga usa ka lalaki nga sama niini og pangidaron ug gituohang nanguyab ni Entenado.

Aduna sab silay gidudahang kauban sa maong suspetsado nga kasamtangang giimbitar sa kapolisan apan gipugngan una ang ilang mga pangalan samtang nagpadayon ang imbestigasyon. (/IBM)(BANAT NEWS)