Pabrika gireklamo sa mga residente

CEBU, Philippines – Mga residente sa Barangay Cansojong, Dakbayan sa Talisay ang nireklamo sa pabrika sa bihon nga naa sa ilang dapit.

Kini human ilang naobserbahan nga nagsige kini og buga og itom nga aso nga maoy hinungdan nga ang ilang hinayhay o hinumulan masagolan og itom nga hugaw.

Ang silingan sa maong pabrika nga mga residente nga nangreklamo mao ang Fortune Plains ug Sitio Olango.

Si Lonita Roz, residente sa lugar, nagkanayon nga nabalaka sila sa ilang panglawas base sa ilang naobserbahan sa ilang palibot.

Gani bisan pa man sa gamay nga ubo nga ilang gipamati, sila magduda nga ang aso nga gibuga sa panghaw maoy ilang pasanginlan.

Asoy ni Roz nga ang ilang poso nga maoy ilang gisaligan nihinay na og agas tungod sab sa duha ka dagkong deep well nga naa sa maong pabrika.

Matud niya nga kusog gyud ang ilang tubig kaniadto apan karon pwerte na nga hinaya.

Gisuwayan sa pagkuha og habig ang tagdumala sa pabrika apan walay niatubang sa mga sakop sa tigbalita.

Si Kapitan Vic Oberes sa Barangay Cansojong niingon nga iya na nga nadawat ang reklamo sa mga residente apan iya una kining i-refer sa mga opisyal sa siyudad. (/GMR)(BANAT NEWS)