Parojinog nag-operate dinhi?
CEBU, Philippines – Gidudahan karon sa Police Regional Office-7 nga gikan sa mga Parojinog didto sa Ozamiz City ang mga drugas diri sa rehiyon human nga nadakpan sa gipahigayong one time big time operation kagahapon ang usa ka gikatahong sakop sa maong grupo.
Nadakpan pinasikad sa warrant of arrest si Jurilyn Pagalan ,37 anyos, taga Bitoon, Ozamiz City.
Butyag pa ni Police Chief Supt. Debold Sinas, direktor sa PRO-7 nga human nalutsan og warrant of arrest sa kasong drogas didto sa Ozamiz City si Pagalan, giingong nagtago na kini didto sa Tudela.
Matud pa nga human siya nasigpatan sa Tudela nibalhin dayon kini sa Dakbayan sa Talisay apan natultolan gihapon apan sa gihapon nibalhin kini og puyo sa Basak, Dakbayan sa Lapu-Lapu ug didto na siya nadakpan.
"We have suspected long time ago nga naa gyuy link didto, karon with the presence of Pagalan confirms our report nga naa gyud silay transaction pagdala diri," matud pa sa maong heneral.
Giingong gigamit sa mga galamay sa mga Parojinog ang Cebu nga tagoanan ug huloganan og ilegal nga drugas. Tungod niini pahugtan karon sa kapolisan ang pagbantay aron di makasulod ang supply sa drugas dinhi.
Sa laing bahin, giklaro ni Sinas nga nagpahigayon sila sa maong operasyon dili tungod kay na-pressure sila ni President Rodrigo Duterte.
"We are not pressured, this plan came ahead pa because conducting an OTBT or an Enhanced Management Police Operation takes planning," matud sa maong heneral.
Dugang niya nga mas tutokan nila karon sa pagsilbi og search warrant sanglit mas dako ug daghan sila og makuhang drugas ug mabulabog ang mga drug den.
Si Pagalan, ang giingong sakop sa Parojinog nihimakak sa alegasyon batok niya ug mihimakak nga may nakuhang ginadili nga drugas gikan kaniya ug siya miingon nga nikuyog siya sa kapulisan tungod kay nalutsan siya og warrant. (/IBM)(BANAT NEWS)
- Latest
