P26.4 milyon wa ma-liquidate ni salubre
CEBU, Philippines – Gipaninglan na sa Kapitolyo ang provincial treasurer sa wala pa ma-liquidate niini nga cash advance sukad pa niadtong tuig 2006.
Si Provincial Accountant Ramon Dumayac Jr. nipadala na og demand letter kang Atty. Roy Salubre pagkwenta na sa iyang cash advance nga moabot sa P26,405,229.81 niadtong Pebrero 26, 2018.
Sa tubag nga sulat ni Salubre kang Dumayac niadtong Pebrero 28, 2018, kini nisaad nga i-settle ang iyang cash advances sulod sa tulo ka buwan.
Apan si Dumayac nagkanayon nga hangtud karon wala pay liquidation report nga nasumiter si Salubre.
Apil sa wala ma-liquidate mao ang P100,000 nga gasto alang sa Cebu Capitol Team sa Southern Leyte tragedy niadtong Pebrero 28, 2006; gasto sa testimonial program ni kanhi Chief Justice Hilario Davide Jr. niadtong Enero 2006 nga moabot sa P50,000; pag-apil sa Cebu Province (Haladaya) sa Sinulog 2007 nga mokabat sa P394 mil; pipila nga gasto sa 439th Founding Anniversary niadtong tuig 2008 nga moabot sa P248 mil.
Laing wala ma-liquidate mao ang gasto atol sa Pasigarbo sa Sugbo niadtong 2008; sweldo sa mga empleyado sa Tudela sa buwan sa Mayo 2009 lakip na sa clothing allowance ug mid-year bonus nga moabot sa P45 mil; gasto sa Suroy-Suroy Sugbo sa Camotes Island niadtong 2009.
Labing daku nga wala ma-liquidate ni Salubre mao ang "intelligence expenses" niadtong Abril 16, 23, 30 ug Mayo 7, 2010 nga moabot sa P25 milyones diin sa matag adlaw nga na-release moabot sa P5 milyones ang cash advance ni Salubre.
Base sa memorandum circular sa Civil Service Commission nga mamahimong mag-atubang og kasong administratiba ang opisyal sa gobiyerno kung dili kini maka-liquidate ug mamahimo nga masuspenso o matangtang sa serbisyo.
Si Gobernador Hilario Davide III nagkanayon nga nasayud na siya sa wala pag-liquidate ni Salubre ug iya na nga gimandoan ang Provincial Legal Office nga mohimo og lakang kabahin niini.
Si Davide nihangyo na sa Bureau of Local Government Finance nga ilisan ang provincial treasurer apan hangtud karon wala pay tubag nga nadawat. (/GMR)(BANAT NEWS)
- Latest
