Kaparian gipahinumdoman sa gipiling bokasyon

CEBU, Philippines — Kapin sa 500 ka pari gikan sa Central Visayas, Maasin, Bohol ug uban pang lugar ang gipaubos sa tulo ka adlaw nga panagtigom o Clergy Assembly of the Ecclesiastical diin tinguha niini mao ang pag-umol og labing komprehensibong code of conduct.

Si Padre Augusto Jesus Angeles, III, main facilitator sa maong tigom, nagkanayon nga ang maong code of conduct pagpahinumdum kini sa ilang gipanumpaan dihang sila giordinahan diin dili ang personal nga interest ang hunahunaon apan ang interest sa simbahan ug sa Ginoo.

Sa maong code of conduct anaa ang kaimportante sa kabalaan sa pagkapari ug sa ilang ministry.

Samtang si Padre Jonald Concha, pangulo sa ongoing formation of clergy sa Archdiocese of Cebu, nagkanayon nga ang tulo ka adlaw nilang panagtigom panahon usab kini sa pagsusi sa kamahinungdanon sa ilang bokasyon sa pagkapari sa ilang prayer life ug relasyon ngadto sa Ginoo ug sa katawhan.

Nangulo sa maong panagtigom si Archbishop Jose Palma lakip ang ubang mga obispo sa nagkadaiyang diocese.

Gitug-an ni Palma nga sama sa ubang mga tawo dili usab sila perpekto ug kinahanglan usab pahinumduman sa ilang gipili nga pagpangalagad

Mapasalamaton si Palma nga bisan dili tanang mga kaparian nanambong  sa tigom apan niabot ngadto sa 500 ka pari ang nitambong niini. (/BDB)(BANATNEWS)