Pagtukod sa I-ACT pasado na

CEBU, Philippines — Sa tinguha nga mahapsay ang dagan sa trapiko sa tibuok Probinsiya sa Sugbo, giaprobahan na sa hunta probinsiyal ang ordinansa sa pagmugna sa Inter-Agency Council for Traffic Operation and Management (I-ACT).

Tumong niini nga mausa ang polisiya sa trapiko pinaagi sa pagpakig-alayon sa mga lokal nga kagamhanan sa Lalawigan sa Sugbo.

Gitinguha usab nga masulbad ang problema sa trapiko ilabi na sa Metro Cebu.

Si Jonathan "Joy" Tumulak, focal person on traffic management, nagkanayon nga ang I-ACT Cebu langkuban sa mga opisyal gikan sa mga Local Government Units ingon man sa mga hingtungdan nga ahensya nga adunay kalambigitan sa trapiko sama sa Department of Public Works and Highways, Land Transportation Franchising and Regulatory Board, Philippine National Police Provincial Command, Provincial Disaster Risk Reduction and Management Office, Provincial Engineer ug Planning Officer ug uban pa.

Si Tumulak nagkanayon nga importante nga adunay representasyon gikan sa mga ahensya ug LGUs aron matubag ang matag suliran sa trapiko sa lungsod ug dakbayan.

"Kon ugaling dunay motumaw nga mga problema, dunay pagahimuon nga meeting, pagasaw-an kining maong problema unya pangitaan dayon kini og solusyon,” matud ni Tumulak.

Ang I-ACT aduna kini gahum nga maka-review ug maka-evaluate sa lagda sa trapiko sa mga LGUs.

Karon nga na-establisar na ang I-ACT, si Tumulak nanghinaut nga adunay hugot nga koordinasyon tali sa DPWH ingon man sa mga LGUs ilabi na sa road projects nga usa sa makatampo sa kahuot sa kadalanan. Ang I-ACT Cebu pangulohan ni sa gobernador ug ang vice chairman mao ang mapili nga executive director sa maong council.

Ang ordinansa sa I-ACT gipangamahanan ni Bokal Edsel Galeos nga maoy chairman sa committee on public services. (/GMR)(BANATNEWS)