SPO1 Balili gilubong na
CEBU, Philippines — Gilubong na kagahapon sa Pardo Public Cemetery si Senior Police Officer 1 Roderick Balili kinsa namatay gumikan sa giingong accidental firing.
Gawas sa pamilya, nanambong sab ang mga higala, kaparyentehan ug kaubanan ni Balili sa Philippine National Police ug kadagkuan sa Police Regional Office (PRO-7). Gihatagan og police honor si Balili diin sa wala pa kini hingpit nga gilubong gipahigayon una ang 21-gun salute.
Si Senior Supt. Ronald Oliver Lee, hepe sa Directorial Staff sa PRO-7, maoy nagrepresentar ni PRO-7 Regional Director Debold Sinas sa pagpaabot sa ilang pahasubo sa pamilya ni Balili ingon man ang paghatag sa ilang katapusang pagyukbo sa kauban sa trabaho.
Sigun ni Lee nga ang tanang benepisyo ni Balili ihatag sa pamilya nga karon giproseso na.
Dihang nahitabo ang insidente ni Balili nigawas ang mga taho nga matud pa konektado sa pagbanhig patay kang Philippine Drug Enforcement Agency (PDEA-7) Agent Von Rian Tecson sa Dakbayan sa Carcar.
Apan taliwa sa maong estorya, si Lee niasoy nga dili kini makaapekto kanila ug magpadayon gihapon sila sa paghimo sa ilang trabaho.
Gihimug-atan nini nga dili sab kini makapaubos sa ilang morale ug ang nahitabo kang Balili mamahimong inspirasyon nila sa PNP nga mas motrabaho pa og maayo alang sa katawhan. Adunay refresher training nga ipahigayon labot sa paghupot og armas aron malikayan ang nahitabo kang Balili, matud ni Lee. (BANAT NEWS)
- Latest
