HDO gipagawas batok kang Lim
CEBU, Philippines – Ang Makati Regional Trial Court (MRTC) mipagawas na og Hold Departure Order (HDO) batok sa Sugboanong negosyante nga si Peter Lim kinsa gilambigit ni President Rodrigo Duterte sa ilegal nga drugas.
Ang maong HDO gi-issue ni Acting Presiding Judge Gina Bibat-Palamos sa MRTC Branch 65 kagahapon.
“Finding the grounds relied upon by the prosecution to be impressed with merit, the Urgent Ex-Parte Motion for the Issuance of Hold Departure Order against Peter Go Lim is granted,” ang pagbasa sa maong order sumala pa sa report gikan sa Philstar.Com. Niadtong miaging semana si Justice Secretary Menardo Guevarra miingon nga ania pa sa nasod si Lim kon basehan ang ilang monitoring.
Si Lim giingong milarga niadtong Marso apan nakabalik na kini ug wala na nabantayi nga nilarga og balik.
Si Lim usa sa mga ginganlan ni self-confessed drug lord Rolan ‘Kerwin’ Espinosa nga usa sa supplier niya sa ilegal nga drugas apan gihimakak kini ni Lim.
Agosto 14 dihang nigawas ang warrant of arrest batok ni Lim ug mga kauban. Gawas sa PNP gitahasan ang National Bureau of Investigation pagsikop kaniya.
Si Lim nag-atubang og duha ka kaso paglapas sa Republic Act 9165. (/IBM)(BANAT NEWS)
- Latest
