Traffic enforcer gipatay

CEBU, Philippines – Bag-ong graduate sa pagka traffic enforcer training sa Barangay Punta Princesa gipatay sa wala mailhing mamumuno diha duol sa sam-ang sa Barangay Labangon ning Dakbayan sa Sugbo kagahapon sa kaadlawon.

Ang biktima naila nga si Guiseppe Lucas Caballero, taga barangay Pardo samtang ang mamumuno wala mailhi.

Matud pa ni Police Officer 3 Esmeraldo Rellova Jr., Desk Officer sa Punta Police Station may gikaestoryang tawo ang biktima apan gisundan kini og butobuto sa armas.

Pagsusi sa mga tawo nakit-an ang biktima nga nahagba na sa dalan apan wala na ang mga mamumuno.

Personal nga bangi maoy gitutukan sa kapulisan nga motibo sa pagpusil patay kang Caballero. Samtang si Rebecca Omagay, sa Admin Office sa barangay Punta Princesa nitug-an sa Banat news nga kanhi barangay tanod si Caballero, human nilingkod ang bag-ong kapitan nag-traffic enforcer kini ug kagahapon mao unta ang unang adlaw ni Caballero sa bag-ong trabaho. (/IBM)(BANAT NEWS)