Katol sa dagat sa oslob ipasusi

CEBU, Philippines – Gimanduan ni Bise Gobernador Agnes Magpale ang Provincial Tourism Officer nga susihon kun hugaw ba gyud ang dagat sa Barangay Tan-awan, Oslob.

Kini human nakadawat ang bise gobernador og taho nga ang mga turista nireklamo na nga mangatol ang ilang lawas human sa langoy uban sa butanding.

Matud ni Magpale nga adunay ekipo ang Probinsiya sa Sugbo nga makasukod kun luwas ba ang tubig o dili sama sa ilang gihimo sa Kanlabog River sa Lungsod sa Badian ug Alegria.

Gusto usab niya mahibaw-an kun kontaminado na ba ang tubig sa dagat sa Oslob aron adunay aksyon nga mahimo.

Samtang niawhag si Magpale sa mga resort owners nga mohimo og “precautionary measures” aron maseguro nga luwas ang ilang mga bisita human upat ka Chinese ang naangol sa sa paghagsa sa elevator sa usa ka hotel sa Lungsod sa Oslob.

Matud ni Magpale nga wala man hinoon magkulang ang mga personnel sa maong hotel sa pagpahimangno sa mga langyaw apan wala kini magpasabot nga walay himoon nga aksyon ilabi na nga gamay nga aksidente sa mga turista makaapekto na dayon sa dungog sa turismo sa probinsiya. (/GMR)(BANAT NEWS)