Elevator nahagsa upat ka Chinese national angol

CEBU, Philippines – Upat ka Chinese national ang nalandig diha sa pribado nga tambalanan sa Dakbayan sa Sugbo  human nangaangol sa pagkahagsa sa gisakyan nilang elevator sa usa sa mga hotel sa Lungsod sa Oslob.

Ang mga naangol mao sila si Panwan Hua, 41-anyos, dalaga taga Ghuanzo China, Danze Xe, 72, Pan Xuebeng, 61, ug Dong Ling, 32.

Matud ni Police Officer 3 Albert Almario, Desk officer sa Oslob Police Station nga gikan nanan-aw og botanding ang mga langyaw ug nipauli kini sa ilang gipuy-an ug nihangyo nga mosakay sa elevator apan sa ilang pagsakay nabugto ang kable sa elevator ug nahagsa ngadto sa napulo ka tiil ang giladmon.

Matud ni Almario nga ang maong elevator alang lang gyud unta sa mga bagahi apan nihangyo ang maong mga langyaw nga mosakay.  Ang mga biktima giatiman kini sa tagdumala sa maong hotel diin usa sa ilang mga staff maoy niatiman sa tanang mga panginahanglanon sa mga biktima. (/BDB)(BANAT NEWS)