Kompaniya ni Kapitan Mabatid gireklamo
CEBU, Philippines – Usa ka 40-anyos nga lalaki nagpatabang ngadto sa National Bureau of Investigation (NBI) sa iyang pagpangayo og refund gikan sa visa processing company nga giingong iyaha sa kapitan sa Barangay Mabolo Niña Mabatid.
Si Levi Cortes, 40-anyos nidangop kini ngadto sa NBI tungod kay buot niining mangayo og refund sa P83 mil nga giingong iyang nabayad sa PinoyCare Visa Center kinsa maoy nagproseso sa iyang mga dokumento aron unta siya makatrabaho ngadto sa nasud sa Canada niadtong Septiyembre 2016.
Matud ni Cortez nga nakompleto niya ang tanang dokumento nga gipangayo sa maong visa center apan wala siya nakapasar sa standard o passing rate sa International English Language Testing System (IELTS) nga gi-set sa PinoyCare.
Apan base sa website sa Canadian government nakapasar siya sa passing score nga “3” sanglit ang resulta sa iyang exam nakakuha siya og dili moubos sa “5” nga score.
Si Cortez nidesisyon nga dili na lang niya ipadayon ang pagproseso pagawas sa nasud pinaagi sa PinoyCare ug gusto na lang siya nga hatagan og refund sa iyang nagasto. Si Mabatid sa iyang bahin, nagkanayon nga dili sila mo-refund ug mopatigbabaw ang ilang kasabotan base sa memorandum of agreement diin ni-assist sila kang Cortez apan nahagbong kini sa IELTS.
Si Mabatid nagtuo nga si Cortez nagpagamit sa politika ug nibahad nga mopasaka og kaso batok sa naulahi. (/BDB)(BANAT NEWS)
- Latest
