‘Clean Rider’ gilusad sa Lapu-Lapu

CEBU, Philippines — Hingpit na nga gisugdan sa Lapu-Lapu City  Police Office (LLCPO) ang pagbutang og mga stickers sa mga motorsiklo nunot sa ilang paglusad sa “PNP Clean Rider” sa Lapu-Lapu City Sports and Cultural Complex sa niaging adlaw.

Si Senior Superintendent Lemuel Obon, direktor sa LLCPO, maoy nangulo sa paglusad sa maong programa sa kapolisan sa pagtuman sa kamanduan sa ulohan nilang buhatan isip pamaagi sa pagpakgang sa krimen nga mugna sa mga riding-in-tandem.

Nunot sa maong paglusad nga ilang gihimo, ilang gipapitlan sa mga stickers ang kapin sa 1,200 ka motorsiklo isip pagsanong sa kamanduan ni Philippine National Police Director General Oscar David Albayalde.

“This is our way to address our problem in motorcycle riding suspects,” matud ni Obon.

Sa maong paagi maminusan ang mga reklamo sa mga motorista nga makasinati og kalangan sa ilang checkpoint sanglit tagsa-tagsaon man sa pagrekisa.

Sa nasayran nga ang maong kampanya sa kapolisan nga “Campaign Clean Rider” maoy ilang gitinguha nga kahugtan pa gyud sa pagbantay ang seguridad ug kaluwasan sa mga motorista sa karsada aron mas mapadali pa ang checkpoint sa kapolisan ug mas madali ang pag-ila sa mga motoristang mosupak sa balaud sa trapiko ug ang mga nalambigit sa krimen.

Gitataw ni Obon nga bukas sa pagpasakop kadtong mga motorista sa dakbayan nga mahigugmaon sa kahapsay ug kalinaw apan magdala sa mga rekisito nga naglakip sa Certificate of Registration, lisensiya ug valid identification card.

Ang matag motorista mopakita lang sa rehistro, resibo nga opisyal ug kon matataw nga  anaa na niini anha pa hatagan og sticker nga ipapilit sa ilang motorsiklo nga nagpasabot nga limpiyo. (BANAT NEWS)