Uniporme, armas ihatag sa mga tanod sa siyudad

CEBU, Philippines – Tinguha sa kagamhanan sa Siyudad sa Sugbo nga hatagan og uniporme ang mga tanod sa 80 ka barangay diin usa lang ang desinyo.

Kini proyekto sa Cebu City Office on Substance Abuse Prevention nga gipangulohan ni Garry Lao.

Hinoon ang uniporme adunay marka sa pangan sa barangay ug ang pareho nga desinyo gitumong nga mailhan ang mga tanod sa Siyudad sa Sugbo.

Suportado sa presidente sa Association of Barangay Councils, Kasambagan Barangay Kapitan Franklyn Ong ang plano Lao.

Laing plano nga hatagan og armas ang mga tanod apan prayoridad sa kagamhanan sa siyudad ang mga barangay kapitan alang sa ilang seguridad.

Suportado gihapon sa ABC ang maong plano apan matud ni Ong nga dili kini madali-dali ilabi na ang pag-ila kung kinsay kwalipikado.

“Unahon sa gyud nato ang mga punong barangays, kay dili tanan naay firearms nya i-train pud na sila unsaon pag-handle safely sa firearm then ang mga tanod dayon pero estudyuhan sa gyud na siya kay daghan man sila,” matud ni Ong.

Hayan sa 20 ka tanod sa matag barangay, usa lang matag shift o ang team leader ang mahatagan ug magdepende sab sa budget sa gobiyerno.

“I don’t think we should arm all the 20. Seguro every shift bali naay usa nga makadala seguro. So, importante gyud ang training, dili ta magpataka og issue og armas sa mga tanod kay tinuod gyud na problema gyud na kung dili na mada og tarung,” dugang ni Ong. (/GMR)(BANAT NEWS)