Sesyon naabtan og duha ka gabii

CEBU, Philippines – Nagsugod sa alas 2 sa hapon niadtong Martes ang regular session sa konseho sa Siyudad sa Sugbo diin nahitabo ang mainitong panaglalis sa mga konsehal labot sa duha ka resolutions ug gipadayon kini kagahapon.

Kini naglakip sa resolution ni Konsehal Eugenio Gabuya Jr. nga nagtinguha nga ipadayon ang pakigsabot sa siyudad sa investor nga motukod sa P18-billion Kawit Island Project sa South Road Properties.

Laing resolution ni Konsehal Alvin Arcilla labot sa pagtukod og sanitary landfill sa Binaliw nga usa ka bukirang barangay sa siyudad.

Nilanat og napulo ka oras ang panaglalis sa konseho gumikan sa parliamentary inquiry ni Konsehal Jose Daluz III sa validity sa duha ka legislative measures nga giduso niadtong Martes.

Nunot niini, si Cebu City Mayor Tomas Osmeña nihulagway nga namolitika ang mga konsehal nga sakop sa oposisyon labot sa maong hitabo. “I don’t know what they are doing to Cebu, this is the biggest employment program in the history of South District, 5,000 jobs but because of politics they will even defy the laws and say no its not part of the agenda, the one who suffers is Cebu and the City suffers also because that project will increase the value of SRP,” matud ni Osmeña.

Gisaway sab sa mayor si Bise Mayor Edgardo Labella nga iyang gihulagway nga tataw nga nibabag gyud sa iyang mga proyekto.

Nagtuo si Osmeña nga si Labella nakadawat og mando kang Presidential Assistant for the Visayas Michael Dino.

Tungod sab sa maong hitabo niapelar ang mayor sa katawhan nga tabangan sila nga ang mga konsehal sa oposisyon mahulipan ilabi na nga nagkaduol na sab ang 2019 midterm elections.

Wala na hinoon mobutyag si Osmeña kun mohimo ba kini og legal nga lakang gumikan sa hitabo apan gusto lang niya nga mahibawo ang katawhan sa gihimo sa oposisyon.

“These people they call themselves Cebuanos, they are not acting like Cebuanos, it’s all politics, and dirty politics, very self-serving politics, greedy politics,” matud ni Osmeña.

Kagahapon gipadayon ang sesyon sa konseho nga nagsugod sa alas 3 sa hapon. (/GMR)(BANAT NEWS)