450th Kaplag marker gibuksan

CEBU, Philippines – Gihangop ug gikalipay sa kaparian nga Agustino human gisubhan ang 450th Kaplag historical marker kagahapon sa buntag sulod sa Basilica Minore del Santo Niño nga gitambongan sa mga opisyal sa National Historical Commission of the Philippines.

Matud ni Fr. Pacifico Nohara, OSA, rector sa Basilica, nga daku og tabang ang maong historical marker tungod kay naghatag kini og pagtagad sa kasaysayan ingon man naghatag sab kini og kahulogan kung giunsa pag-ugmad sa kaparian nga Agustino ang pagsugod sa pagsangyaw sa Maayong Balita.

Mapasalamaton sila sa mga naunang kaparian nga Agustino tungod sa mga nahimo niini ug silang kabataan nga henerasyon sa Agustino igo lang mopadayon sa pagsangyaw sa maayong balita.

Mapasalamaton ang kaparian tungod kay naatol sab sa tuig sa mga Clergy ug Consecrated Life gisubhan ang maong marker nga naghatag og pagtagad sa kaparian nga Agustino nga naningkamot nga makaabot gyud sa katawhan ang tinuod nga pagtuo hinungdan nga daku ang ilang pasalamat kay grasya kini nga gihatag sa Ginoo pinaagi sa Balaan nga Bata sa niaging 450 na ka tuig ang nilabay.

Samtang ang chairman sa NHCP, Rene Escalante, nitug-an nga sa pagbukas nila sa national historic marker sa ika-450 ka tuig sa Kaplag, tulo ka dagkung kontribusyon sa mga Agustino ang ilang gilantaw nga naglangkub sa pagpabarug sa mga simbahan, edukasyon ug pagpalapad sa Kristiyanismo.

Dugang ni Escalante nga sa maong marker, masuta ang kasaysayan sa mga relihiyosong Agustino sa Pilipinas. (/GMR)(BANAT NEWS)