AKRHO mosuporta ni Inday Sara
CEBU, Philippines – Mosuporta ang Alpha Kappa Rho (AKRHO) lukop nasud sa “Inday Sara Duterte for Senator Movement” nga gipasiugdahan ni Konsehal Erik Miguel Espina. Si AKRHO national president Gilbert Caballero nipirma sa manifesto atol sa 888 News Forum sa Marco Polo Plaza kagahapon diin siya ug si Espina ang lakip sa mga dinapit.
Si Caballero nihapit sa Sugbo dayon lahos sa Davao City diin himoon ang dakung kalihukan sa pagsaulog sa ika-45 nga anibersaryo sa AKRHO sa Matina Town Square karong adlawa.
Iyang gipasalig nga makuha niya ang suporta sa upat ka milyon ka sakop lukop nasud samtang 25,000 niini sa tibuok Lalawigan sa Sugbo.
Matud ni Caballero nga ang igsoon ni Sara nga si Sebastian “Baste” Duterte ang aktibo nga sakop sa AKRHO.
Gikalipay ni Espina ang maong kalamboan sanglit nagkinahanglan sila og dili mominus usa ka milyon ka pirma sa pag-awhag kang Davao City Mayor Sara Duterte-Carpio sa pagdagan sa pagka-senador sa eleksiyon sa 2019.
Gipasabot ni Espina nga walay laing modagan nga Sugbuanon sa pagka-senador sunod eleksiyon ug maayo na lang nga si Duterte-Carpio taga Dakbayan sa Danao ang kagikan.
Samtang wala pay plano ang Barug Team Rama sa Dakbayan sa Sugbo nga kaalyado sa Partido Demokratiko Pilipino-Lakas ng Bayan (PDP-Laban) nga moapil sa Hugpong Ng Pagbabago ni Mayor Duterte-Carpio.
Nagkanayon si Bise Mayor Edgardo Labella, chairman sa PDP-Laban-Cebu City, nga ang ilang grupo wala pa makahisgut niini apan nakadawat na sila og imbitasyon gikan sa HNP. (Decemay P. Padilla/GMR)(BANAT NEWS)
- Latest
