CCTV cam angayang seryusohon
CEBU, Philippines — Seryusong pagpabutang og closed circuit television (CCTV) camera sa mga establisemento ang gipanghinaut sa kapolisan sa Dakbayan sa Talisay.
Kini human naobserbahan ni Insp. Rene Cerna, deputy chief sa Talisay City Police Station, nga daku kaayo og tabang ang CCTV footage sa mga panghitabo.
Matud ni Cerna nga kung may krimen nga mahitabo nga makuha sa CCTV camera, dili maglisud ang kapolisan sa pagsubay sa kaso ug pag-ila sa responsable sa krimen.
Samtang si Konsehal Arturo Bas, chairman sa committee on peace and order sa konseho sa siyudad, nitataw nga dugay na ang ordinansa nga nagmando sa mga establisemento sa pagbutang og CCTV camera apan wala lang gyud kini gituman sa uban.
Kung duna may nituman apan “for compliance” lang og walay nindot nga kuha ang maong camera sumala pa ni Bas.
Si Bas mao ang apohan ni barangay konsehal Art Stephen Bas sa Lagtang nga gipatay sa wala pa mailhing mamumuno sa may South Road Properties (SRP) sa Barangay Cansojong.
Ang lugar gibag-ohan unta og traffic light lakip ang CCTV camera apan niadtong higayona wala pa kini nataud hinungdan nga wala makuha ang porma sa mga kriminal. (BANAT NEWS)
- Latest
