Nasunogan sa Kamputhaw planong i-reblock

CEBU, Philippines — Tinguha sa Division for the Welfare of the Urban Poor (DWUP) nga mopatuman og reblocking sa Purok Lower 3, Sitio Lupa, Kamputhaw, Siyudad sa Sugbo nga naigo sa sunog niadtong Sabado diin dili mominus 100 ka panimalay ang naugdaw.

Sa ocular inspection nga gihimo, ang operations chief sa DWUP, Genevieve Alcoseba, nakakita nga kinahanglan ibalik ang pathways ug saktong sukod sa home lots alang sa emergency purposes sa dapit.

Sagad sa mga naapektuhan sa sunog nalakip sa 93-1 lots nga karon gipanag-iya na sa siyudad.

“Usa na sa atong pinaka-goal puslan man nga i-award ang yuta na gyud sa mga actual occupants dapat han-ayon pud nato sila but we also have to refer sa approved subdivision plan ani unya tan-awon nato unsay mga possibilities basta lang atong buhaton is the best for the area, the best for the community maoy atong ipa-implement sa siyudad,” sigun ni Alcoseba. Karong adlawa, ang DWUP mohimo og consultation meeting sa mga biktima sa alas 6 sa gabii sa usa sa mga basketball courts sa Barangay Kamputhaw.

Si Barangay Kapitan Jessica Cadungog pabor sa lakang sa kagamhanan sa siyudad.

Ang Department of Social Welfare and Services nagproseso na sa P20,000 nga cash assistance matag pamilya ug housing materials alang sa mga apektado sa sunog. Ang mga biktima kasamtangang nag-okupar sa Purok 8 Gymnasium diin gipanghatag ang relief goods alang sa 1,000 ka indibidwal nga sakop sa 449 ka pamilya sa 107 ka panimalay nga naugdaw.

Gumikan sa kahuot sa gymnasium, ang uban tua sa University of the Philippines grounds.

Ang Cebu City Health Department pinaagi sa Long Life Medical Assistance Program nanghatag og mga tambal, medical check-up sa mga biktima labi na sa mga bata nga nangasakit ug anti-tetanus nila.

Sa laing bahin, P420 mil ang danyos sa sunog nga niulbo sa Sitio Santo Niño, Lamac, Consolacion niadtong Domingo sa hapon diin dili mominus lima ka panimalay ang hingpit nga naugdaw. Richel Ann P. Basiga.  (BANAT NEWS)