Kabatan-onan ilambigit sa urban farming
CEBU, Philippines – Ang lokal nga kagamhanan sa Siyudad sa Sugbo pinaagi sa Cebu City Agriculture Department ni-turnover sa agricultural farm inputs ngadto sa kabatan-onan ug urban farmers sa Siyudad sa Sugbo kalabutan sa ilang proyekto nga “Glamorizing Farming through Urban Agriculture.”
Ang mga batan-on karon ang gitumong nga ilambigit sa urban farming tungod kay nabantayan sa lokal nga kagamhanan nga nawala na ang kaikag sa mga batan-on sa pagpananom ug pag-ila sa tanom.
Si Cebu City Agriculturist Apple Tribunalo niingon nga pinaagi sa maong programa mahimamat sa mga batan-on ang agrikultura diin gipaningkamutan nila nga mabuhi pagbalik ang interest sa mga batan-on sa pagpananom.
Giingong i-introduce sa training sa mga nisalmot ang bag-ong teknolohiya sama sa soilless planting technology ug ang newspaper technology nga initiative ni Mayor Tomas Osmeña.
Matud ni Tribunalo nga ang maong pamaagi makahatag og kakuryoso sa mga batan-on diin mapursigido na unya sila sa pagkat-on.
Niabot ngadto sa 34 ka urban barangays ug 10 ka pampublikong eskwelahan ang nisalmot sa maong programa kini uban sa Department of Education (DepEd) diin gidasig nila sa pagsalmot ang ubang pampublikong tunghaan aron usab mabuhi ang ilang pagpananom og mga utanon. (/BDB)(BANAT NEWS)
- Latest
