Gica wa pa kalingkawas sa kaso
CEBU, Philippines – Alang kang kanhi Dumanjug Mayor Nelson Garcia, wala pa nakalingkawas si Mayor Efren Guntrano Gica sa kaso sa iyang pagbalik na sa pwesto.
Matud ni Garcia nga nagamit lang ni Gica ang Aguinaldo Doctrine dihang napili siya nga mayor samtang ang sala nabuhat niadto pang bise mayor pa siya.
“Sa ato pa gipasaylo siya sa katawhan kay elected man sya. Kay ni-apply siya og condonation (doctrine) which is tantamount to accepting nga sayop siya, kay ni-avail man siya sa condonation, matud ni Garcia.
Sa Aguinaldo Doctrine ang usa ka piniling opisyal nga nakasala o adunay kasong administratiba makonsiderar nga napasaylo sa publiko kun mapili kini pagbalik sa katawhan atol sa eleksyon.
Niadtong 2015 gibaliwala na sa Korte Suprema ang maong doktrina apan tungod ang kaso batok ni Gica napasaka niadtong 2014, nagamit pa kini nga maoy gibasehan sa Court Appeals sa pagbasura sa kasong serious dishonesty ug grave misconduct.
Si Gica napili sa pagka-mayor sa Lungsod sa Dumanjug niadtong 2016 elections.
Ang kaso ni Gica nagsugod sa reklamo nga gipasaka ni Garcia sa giingong pagpaburot sa bayranan sa gikan-an nga restaurant sa Dakbayan sa Sugbo pinaagi sa pag-usab sa resibo gikan sa P10 mil ngadto sa P20 mil. Si Garcia nagkanayon nga maghuwat na lang siya sa desisyon sa Sandiganbayan sa kasong kriminal may kalambigitan gihapon sa maong reklamo. (/GMR)(BANAT NEWS)
- Latest
