Polis nangulata og menor?

CEBU, Philippines — Ang Chief Investigator sa Tabogon Police Station gipasanginlang nangulata og usa ka menor de edad niadtong Sabado diha sa Sitio Bitoon, Barangay Muabog, Lungsod sa Tabogon.

Nag-viral diha sa social media ang video footage ni Senior Police Officer 1 Epifanio Comedido, Jr.

Kinsa giingong nangulata og 16-anyos nga bayongbayong.

Si SPO2 Gregorio Licayan sa Tabogon Police Station nagkanayon nga off duty si Comedido niadtong higayona diin uban ang iyang pamilya ug pipila ka mga higala nga nangaligo og dagat sa maong lugar.

Dihang paingon na unta silang mopauli nabanggaan og usa ka motorsiklo nga gimaneho ni Dante Cawayan, 46, residente usab sa maong lungsod ang bana sa ig-agaw ni Comedido nga si Sosina Pogado, 64-anyos, taga Tabogon ug nawagtangan kini sa panimuot.

Giingong gimandoan ni Comedido ang mga tawo diha sa lugar nga imando ang magpadulong nga mga sakyanan samtang iyang gisuwayan  sa pag-revive si Pogado.

Usa ka motorsiklo nga nagpadulong ug giingong wala kini namati sa mga tawo nga mopahinay og padagan hinungdan nga deriyot sila mabanggai. Gipangitaan ni Comedido og lisensiya ang drayber sa motorsiklo apan wala kini makapakita ug sa kalagot sa polis giingong gikulata niini ang maong drayber.

Ang bata giingong nagdali kini tungod kay gisugo sa iyang ginikanan sa pagpaningil sa mga suki sa negosyo nilang isda.

Gipasakaan na og kasong pagpangabuso og bata ang maong polis ug girelibohan na kini ug anaa kini gibutang sa Police Holding and Account Unit (PHAU) sa Cebu Provincial Police Office. Ang Banat News nisuway og kuha og habig sa hepe sa CPPO apan wala kini nipagawas og pamahayag. (BDB) (BANAT NEWS)