Ang perpektong adlaw

CEBU, Philippines — Daghang mga malumo og kasingkasing ug mga inila natong duol sa dughan nga mga kahigalaan ang nitambag kanako nga mas maayo kon mo-menor ako sa akong mga gipangbuhat karon tungod sa atong pangidaron.

“Dodong, we think you have done more than enough in taking care of the legacy of your father, Don Vicente, with the support of your wife, Nena and the inspiration of your mother Mama Pining. It is time for you to take a breather, travel, enjoy what remains of your journey,” nila pa.

Tinuod, mahimo ko nang buhaton, apan dili. Kinahanglan pa nakong tutokan ang preparasyon sa umaabot nga Centennial Celebration sa unibersidad nga maoy legasiya ni Papa Inting nga mahitabo sa sunod tuig 2019 kadungan usab sa The Freeman, nga gitukod sa akong uyoan nga si Atty. Paulino Gullas.

Ang The Freeman akong gi- revived niadtong 1965 ug karon mao nay labing karaan nga nagmantala dinhi sa Sugbo ug mosaulog usab sa ika-100 ka tuig niining kasumaran sa sunod tuig.

Sa samang higayon, ako kanunay gipahinumdoman ang akong kapikas nga si Nena nga magpadayon ang mga relihiyosong mga kalihokan nga gisugdan sa akong Mama Pining sukad pa kaniadto.

Sa pagkatinuod, kinahanglan pa nakong masayran ang eksaktong petsa kon kanus-a gyud nagsugod ang unibersidad ug ang The Freeman.

Apan amo gyung gisiguro nga itunong ang selebrasyon sa Enero 12 (sa unibersidad) nga maoy adlaw nga natawhan ni Papa Inting, ug sa Hulyo alang sa The Freeman.

Apil sa mosaulog sa ika-100 nga katukoran sa unibersidad ang tanang satellites schools niini sa tibuok probinsya. Tungod kay kabahin man sila sa damgo kaniadto ni Papa Inting nga mahatagan og edukasyon ang tanan bisan kadtong mga walay ikasarang pagpatungha sa ilang mga anak dinhi sa siyudad.

Tinuod, nindot kaayong molarga ug magsuroy-suroy sa abroad, apan mas nindot paminawon kon makatabang kita sa atong mga kabus nga mga kaigsuonan.

 Sayo niining semanaha, makaingon ko nga nakasuway ko og perpektong adlaw.  Kini dihang ang akong kapikas nga si Nena nanghagad nga duawon ang lugar diin sila nananom og mga kahoy didto sa Lungsod sa San Fernando sa miaging tuig kauban ang mga miyembro sa Cofradia de la Virgen de Lourdes nga iyang gipamunoan.

Posisyon kini nga dugay nga gihuptan ni Mama Pining sa taas nga katuigan sa buhi pa kini. Tungod niini nakahigayon kami pagbisita sa Shrine sa atong igsuong Alagad sa Ginoo, Archbishop Teofilo Camomot diha sa Daughters of St. Teresa Compound sa Valladolid, Carcar.

Human sa Santos nga Misa nga gihalad sa buotan natong higala nga si Rev. Fr. Brian Brigoli, nagrosaryo mi, nilitok og mga pag-ampo alang sa pagbayaw ngadto sa pagka beato ni Bishop Camomot.

Nakahigayon kami pag-ampo para sa maayong panglawas, panag-uliay, petisyon para sa among mga kasingkasing, kinaadman ug giya para sa pagsagubang sa inadlaw –adlaw hagit sa kinabuhi.

Namauli kami nga gibati og espirituhanong pagkaalim ug gaan ang paminaw nga di matugkad.(IBM)(BANATNEWS)