Emit nipabuhagay sa kasagmuyo sa kaubanan

CEBU, Philippines – Dili motuo si Konsehal Doroteo “Dory” Emit sa Siyudad sa Talisay nga dunay pagsanong ang kadagkuan sa partidong Alayon sa pagtangtang sa iyang komitiba, Legislative Assistance Fund (LAF) ug kota sa job order.

Nagpakahilom sa pipila ka buwan si Emit apan atol sa ilang sesyon siya nibarug ug nipadayag sa iyang kasagmuyo sa iyang kaubanan.

Matud niya nga ang pagkawalay committee chairmanship ug membership dili babag alang sa paghimo og tinud-anay nga serbisyo sa mga Talisaynon.

Siya nagkanayon nga ang wala paghatag og commitee chairmanship ug membership usa ka pagyatak sa prinsipyo sa partidong Alayon kay ang nagserbisyo og tinud-anay mao hinoon ang gihikawan.

Wala sab siya nabalaka sa iyang sitwasyon kay dili kini maoy sukdanan sa tinud-anay nga pagpanerbisyo ug labaw sa tanan ang iyang gialagaran mao man ang Ginoo ug Talisaynon ug dili ang mga konsehal ug bise mayor nga kwestiyonable ang baruganan.

Una niini si Bise Mayor Alan Bucao   nipadayag nga dili iya ang desisyon sa pagpahamtang og silot ni Emit kun dili iya sa partido.

Samtang si Kongresista Gerald Anthony “Samsam” Gullas niingon nga adunay ingon niini nga panghitabo o isyu sa matag lokal nga kagamhanan apan dili kaayo siya manghilabot sa inadlaw-adlaw nga desisyon.

“If it’s the decision of the group of every LGU I will support it,” asoy ni Gullas. (/GMR)(BANAT NEWS)