Nito Durano mitabang pagkombinser ni Magpale

CEBU, Philippines – Gikompirmar ni Governor Hilario Davide III nga nagplano si Danao City Mayor Ramonito “Nito” Durano nga iyang kombinseron si Vice Governor Agnes Magpale nga modagan pagbalik pagka bise gobernador sa lalawigan sa Sugbo sunod tuig.  Si Durano kinsa maoy Presidente sa Barug Alang sa Kauswagan ug Demokrasya (BAKUD) Party sa kinto distrito giingong gusto gihapon nga si Magpale modagan alang sa ikatulo ug uwahing termino niini.

“Yeah, ingon siya (nga kombisiron niini si Magpale) but that’s between him and vice governor,” matud ni Davide.

Si Davide una nang nagkanayon nga gusto gyud unta niya nga si Magpale gihapon ang iyang gusto nga maka-tandem sa sunod nga election.

Apan si Magpale nibalibad nga modagan balik tungod sa iyang edad ug gusto niini nga mopahulay na sa politika. Matud pa niya gitahod usab ni Durano ang iyang desisyon.

Si Davide nagkanayon nga dili usab siya mamugos kang Magpale kon pinal na ang desisyon niini ug mangita na lang kini og laing mapares  sa midterm election nga susama ka maayo sa bise gobernador. (/IBM)(BANAT NEWS)