Bagong LLCPO director nilingkod na sa pwesto

CEBU, Philippines – Pagdisiplina sa mga polis, pagtabang sa pagsulbad sa trapiko ug ang pagpahigayon og subsob nga anti-criminality operation maoy prayoridad sa bag-ong director sa Lapu-Lapu City Police Office.

Si Senior Supt. Lemuel Obon pormal na nga nihulip kang Senior Supt. Rommel Cabagnot sa pwesto.

Buot ipatuman ni Obon ang punctuality, honesty ug discipline sa mga sakop hinungdan nga zero-tolerance ngadto sa mga police nga badlungon ug nalambigit sa ilegal nga kalihukan.

Gusto ni Obon nga sul-ubon ang sakto ug limpyo nga uniporme sa kapolisan ilabi na sa ilang dakbayan nga dagsaanan sa mga lokal ug langyaw nga mga turista tungod sa Mactan-Cebu International Airport.

Lakip sa tutukan ni Obon ang pagtabang sa pagsulbad sa problema sa trapiko sa siyudad ilabi na nahimo siyang kabahin sa Traffic Enforcement Unit sa LLCPO sulod sa taas-taas nga tuig.

Tutukan sab sa bag-ong city director ang paghatag og solusyon sa mga nahitabong sunod-sunod nga patay sa dakbayan.

Si Chief Supt. Debold Sinas, direktor sa Police Regional Office-7, nimando sa bag-ong direktor sa LLCPO nga imbestigaron ang sunod-sunod nga patay basin kung adunay posibleng kalambigitan sa drug syndicate.

Samtang si Lapu-Lapu City Mayor Paz Radaza nipadayag sa iyang kaandam sa pagsuporta sa pagdumala ni Obon atol sa paghatag niini og mensahe sa turn-over of command kagahapon.

Nagpasalamat sab si Radaza ug Sinas kang Cabagnot tungod sa kalampusan niini sa mga anti-criminality operation sa dakbayan. (/GMR)(BANAT NEWS)