P1.8 milyon gipangapod-apod sa CSWS sa Mandaue

CEBU, Philippines — Mokabat sa P1.8 milyones nga kantidad ang gihatag sa buhatan sa Mandaue City Social Welfare Services isip tabang sa mga kabus nga molupyo sa dakbayan. Niadtong Biyernes nagtapok ang 300 kapin ka kabus nga molupyo gikan sa 27 ka barangay sa dakbayan sa Mandaue City Cultural and Sports Complex.

Si Jessie Perez, pangulo sa CSWS, niingon nga cash nga hinabang ang nadawat sa mga molupyo nga nangayo og tabang sa kagamhanan nga naglakip sa ilang bayranan sa hospital, tambal, laboratory o galastuhan sa pagpalubong niadtong mga namatyan.

Gitabangan sab sa ilang buhatan pinaagi sa paghatag og salapi nga P3,000 alang niadtong mga kabus nga kabataan nga nagtungha sa kolehiyo.

Gipasabot ni Perez nga gihimo sa ilang buhatan ang higpit nga pagsusi sa mga hangyo ug ilang nasuta nga angayan gyud kini tabangan.

Dugang ni Perez nga nagkantidad og P5,000 ngadto sa P20,000 ang ilang gihatag nga hinabang nga ilang giagad sa kasamtangang kahimtang sa molupyo nga nangayo.

Samtang gipadayon sab sa kagamhanan ang pag-apod-apod og salapi nga hinabang alang sa mga senior citizen ug mga molupyo sa dakbayan nga adunay kabilinggan sa ilang panglawas. (/GMR)(BANATNEWS)