Talisay City Jail alerto

CEBU, Philippines — Alerto ang Talisay City Jail sugod niadtong Biyernes human sa pagbanhig sa tulo ka piniriso nga padulong motambong sa hearing sa korte.

Si Chief Insp. Mary Jane Inopia, warden sa TCJ, nibutyag nga alerto ang ilang buhatan sa pagkakaron gumikan sa dugoong hitabo.

Lakip ang dalaw ang gikanselar aron hatagan og higayon ang pag-imbestigar sa maong hitabo.

Daghang paryente sa mga binilanggo ang nireklamo gumikan sa kalit nga pagkanselar sa dalaw diin igo na lang sila makapadala og pagkaon sa ilang mga minahal sa kinabuhi nga naa sa selda ug dili pa pwede makahinabi.

Ang tulo ka binilanggo nga motambong unta sa ilang hearing mao sila si Yayam Gaviola, 40; Marwin Abelgas, 27, ug Rabadon Jovencio, 36-anyos.

Si Gaviola ug Abelgas aduna’y kasong pagpamaligya og ginadiling drugas samtang si Jovencio frustrated murder ang kaso niini.

Matud ni PO2 John Xyrus Ilustrisimo sa Talisay City Police Station nga nagpakaaron-ingnon ang duha ka lalaki nga natumba sa gisakyang motorsiklo apan diay namusil kini sa mga sakop sa Bureau of Jail Management and Penology (BJMP).

Maayo na lang kay walay nasamdan o napatay sa taga BJMP kay ang target mao ang mga binilanggo.

Si Inopia nipasabot nga duha ra ang escort sa tulo ka piniriso tungod kay kuwang gyud sila og tawo sa ilang buhatan.

Si BJMP-7 Director Arnold Buenacosa kinsa personal nga nisusi human sa hitabo niingon nga wala’y kasaypanan nga nahimo si Inopia diin isipon na lang kini nga leksyon sa pagkuyog sa mga binilanggo paingon sa korte. (/GMR)(BANATNEWS)