Kanhi polis gisuwayan pagpatay

CEBU, Philippines — Nabulabog ang pagpanumpa sa mga opisyales sa Parents Teacher and Community Association sa Labangon Bliss Elementary School human gipusil ang kanhi polis nga si Armando Lozano sa duha ka wala mailhing lalaki sulod mismo sa maong tulonghaan kagahapon sa alas 3:30 sa hapon.

Si Lozano, nagpaabot sa pagsugod sa ilang induction ceremony isip presidente sa PTCA ug nakig-estorya pa ni Konsehal Eugenio Gabuya kinsa pinasidunggan nga dinapit sa maong kalihukan dihang nahitabo ang pagpamusil.

Si Gabuya miingon nga may nadunggan silang  may miestorya ug nasundan kini og  pitik sa armas nga wala makabuto.

Si Lozano daling nidagan apan gipasundan kini og buto sa mamumuno hinungdan nga nagkatibulaag panagan ang mga estudyante ug ginikanan.

Nakatago sa usa sa mga lawak si Lozano ug wala makit-i sa mga mamumuno nga nigukod kaniya. Ang usa sa mga tinun-an sa Grade 2 nitug-an nga nisulod sa lawak nga iyang gitagoan ang mamumuno ug may usa ka inahan ang misulti wala magtago sa lawak si Lozano hinungdan nga nibiya kini.

Ang prinsipal nga si Ricardo Aman nasubo sa nahitabo kay gibuhat kini atubangan mismo sa mga bata. Matud niya ang tulonghaan usa ka dapit sa kalinaw ug kaluwasan para sa mga bata.

Giawhag ni Gabuya si Cebu City Police Office Director Senior Supt. Royina Garma nga pangusgan pa ang police visibility.

Si Police Officer 3 Miguel Dico sa Punta Police Station nitug-an nga padayon pa ang imbestigasyon sa motibo sa pagpusil kang Lozano.

Si Lozano nakontrobersiya kaniadto human usa siya sa upat ka tawong gisuspetsahan pagpatay kang Alden Abiabi niadtong Nobiyembre 24, 1994. Naabswelto si Lozano sa kaso. (/IBM)(BANATNEWS)