Pag-ipit sa Mabolo gisugdan na?

CEBU, Philippines – Gi-clamp sa Cebu City Transportation Office ang upat ka mga sakyanan sa Barangay Mabolo kay matud pa ilegal kini nga gi-park diha sa dalan.

Apan si Kapitan Niña Mabatid nagtuo nga politika maoy nagpaluyo niining pag-clamp sa mga sakyanan sa barangay nga naglangkob sa garbage truck, bus, ug uban pa.

Ang maong mga sakyanan naka-park kilid sa barangay hall ug kilid sa simbahan sa Barangay Mabolo. Kini gi-clamp  kagahapon sa kaadlawon.

Sigon Mabatid nga pila ka tuig na nga anha i-parking sa maong lugar ang maong mga sakyanan kay wala silay saktong parking area.

Nagtuo si Mabatid nga karon nga may kalagot si Mayor Tomas Osmeña kaniya gi-clamp na ang mga sakyanan sa barangay. Matud sa kapitan dumot gyud kining gihimo sa mayor.

“Nangita lang gyud na siya og asa ko masipyat. Unsay pwede ko niya lisod-lisuron and I know nga dili pa ni mao, daghan pa ni, hangtod siguro sa mahuman akong termino,” sigon ni Mabatid.

Gibisita sa Banat News  ang mga sakyanan nga gi-clamp apan gitangtangan na kini og mga clamps human gi-settle kini sa barangay kay makaapektar kini sa batakang serbisyo sa barangay.

Ang Operations Chief sa CCTO Francisco “Isko” Ouano miingon nga wala’y kalambigitan ang mayor sa pag-clamp sa mga sakyanan sa barangay Mabolo kay nakadawat sila og report gikan sa concerned citizen labot niini.

Si Ouano miingon kinahanglang mangita og paagi si Mabatid nga dili makabalda sa trapiko ang mga sakyanan sa barangay.

Giklaro ni Ouano wala’y sagol politika ang ilang gihimo ug wala nila gi-single out ang Mabolo.

“Dili raman sad ilaha maoy atong gi-single out in fact ang Mabolo alone lang na-clamp nato mga 17 clamps other areas 19 so dili lang ingon ilaha lang atong gi-single out daghan gyud ta gi-clamp.” (/IBM)(BANAT NEWS)