Bag-ong anti-hazing law gihangop sa Kapitolyo
CEBU, Philippines — Suportado sa mga opisyal sa Probinsiya sa Sugbo ang pagpirma ni Presidente Rodrigo Duterte nga nagdili sa tanang klase sa hazing ug pagpatuman og mas bug-at nga silot sa mga hazing nga moresulta sa kamatayon.
Ang Republic Act 11053 o ang Anti-Hazing Act of 2018 nga nag-amendar sa RA 8049 o ang Anti-Hazing Act of 1995 nga gisaway tungod kay giingong dili epektibo.
Sa bag-ong balaud nga gipirmahan ni Duterte niadtong Hunyo 29, gisaysay nga ang kadtong moapil sa hazing nga moresulta sa kamatayon, rape, sodomy ug mutilation masilutan og reclusion perpetua ug multa nga P3 milyones.
“I’m not exactly against the accrediting fraternities and sororities sa school, kay that’s a right man sad gud, every college student who long for belongingness, mangita sila og grupo where they want to belong,” matud ni Gobernador Hilario Davide III.
Si Davide kinsa sakop sa Sigma Rho, usa ka law based-fraternity sa University of the Philippines-Diliman niawhag sa mga fraternity nga dili moapil sa mga rambol ug gubot paglikay nga adunay madisgrasya.
Samtang ang executive director sa Provincial Youth Commission nga si James Canoy niingon nga kinahanglang tan-awon pag-ayo sa mga Student Affairs Office (SAO) sa mga unibersidad ug kolehiyo ang mga organisasyon sa ilang mga tunghaan.
Matud niya nga maayo nga kalamboan ang maong balaud sanglit lugak ra kaayo ang karaan nga anti-hazing law. (GMR) (BANAT NEWS)
- Latest
