Kapitan sa Mabolo gikiha
CEBU, Philippines — Ang bag-ong kapitan sa Barangay Mabolo ning Dakbayan sa Sugbo gipasakaan og kasong administratiba sa Ombudsman tungod sa matud pa pagpanghasi sa duha ka kawani sa iladong hotel sa Lahug.
Si Kapitan Prisca Niña Mabatid gikiha ni Welbert Pepito og grave misconduct; conduct unbecoming of a public officer; ug code of conduct and ethical standards for public officials and employees.
Matud ni Pepito nga nainsulto gyud kaayo siya sa gihimo ni Kapitan Mabatid ug sa kauban niini nga si Ramon Floresta kay mora’g gipakaubos ang iyang pagka kawani lang sa hotel.
Asoy ni Pepito nga nakita niya si Mabatid ug Floresta nga buot unta nga mosulod na sa elevator kaniadtong kaadlawon sa Hunyo 19. Nangatahoran siya ug nangutana kon guest ba sila sa hotel ug sa numero sa ilang room isip pagtuman sa palisiya sa hotel.
Si Pepito miingon nga nasuko si Mabatid nga nagpailang kapitan sa Mabolo ug klaro nga nakainom. Dayon, sa footage sa CCTV camera nakita usab nga gitindakan ni Floresta si Pepito, dayong sulod sa elevator.
Apan miabot ang hotel duty manager nga si Irene Juliet Lacerna ug nagpakisayod kon unsay nahitabo. Si Mabatid migawas gikan sa elevator ug gipangkasab-an ang duha ka kawani sa hotel.
Nakita pa gyud sa CCTV footage nga si Floresta nga giingong iladong negosyante sa Mindanao, misiko pa ni Lacerna ug sila si Mabatid ug Floresta nanulod pagbalik sa elevator.
Ang hitabo na-blotter sa Mabolo Police Station samtang ang kontrobersyal nga CCTV footage mikatap na sa social media. Matud ni Mabatid nga nasuko siya kay wala sila ayoha pagtagad isip mga hotel guests.
Nagtuo si Mabatid nga gipadako ra kining maong isyu tungod sa politika, ilabi na nga gidungog nga siya magpapili pagka presidente sa Association of Barangay Councils (ABC) dinhi sa siyudad karong Hulyo 30.
Wala magtuo si Mabatid nga makadaot sa iyang pagka opisyal sa barangay ang nahitabo, ug tubagon ra niya kini kon makadawat na og summon gikan sa Ombudsman. (BANAT NEWS)
- Latest
