Nang-black mail sa uyab gidakop

CEBU, Philippines —  Gidakop sa kapolisan ang 31-anyos nga lalaki kay nanghadlok sa iyang menor de-edad nga girlfriend nga ipakatap niya sa social media ang mga hubo niining hulagway ug videos.

Si Jan Claude Cabanag, taga Barangay Labangon, gisikop sa mga sakop sa PNP Regional Anti-Cyber Crime Office (RACO) atol sa usa ka entrapment operation didto sa Osmeña Boulevard kaniadtong Biyernes sa gabii.

Matud ni RACO-7 chief Leo Dofiles nga mireklamo sa ilang opisina ang 17-anyos nga babaye kauban ang iyang mga ginikanan kay si Cabanag nanghadlok nga ipakatap niya sa Facebook ang mga hulagway sa biktima kon dili kini makigkita kaniya ug tumanan sa iyang gusto.

Ang maong mga hulagway ug videos nakuha ni Cabanag kay nakumbinser usab niya ang dalagita nga i-send kini kaniya pinaagi sa messenger. Nailhan sa dalagita ang suspek pinaagi lang sa Facebook kaniadtong Abril.

Matud pa nga si Cabanag migamit og lain nga profile picture sa Facebook ug nagpatuo nga 22 pa ang iyang edad. Ang dalagita mitug-an nga napanamastamasan na siya ni Cabanag kaduha ka higayon kaniadtong Hunyo 18, ug nasundan niadtong Hulyo 1. Napugos ang dalagita pagtuman sa sugo ni Cabanag kay nanghadlok nga ipakatap sa iyang mga kaila ang iyang mga law-ay nga hulagway ug video kon dili siya makig-date.

Ang kasong rape ipasaka sa piskaliya sa Mandaue kay didto man mahitabo ang pagpanglugos. Ikiha usab kini og paglapas sa Republic Act 9995, o Anti-Photo and Video Voyeurism Act of 2009, ingon man sa Special Protection of Children Against Abuse, Exploitation and Discrimination Act nga may kalabutan sa Anti-Cyber Crime Act. RUB (BANATNEWS)