Gangster sa Alcantara gikabalak-an

CEBU, Philippines – Nabalaka ang usa ka inahan sa tinun-an nga grade 8 sa Alcantara National High School sa giingong kagubot niadtong Huwebes sa udto tali sa mga tinun-an nga sakop sa gangster.

Matud sa maong inahan nga iyang nasayran nga nalakip diay ang iyang anak sa pundok-pundok sa mga batan-on ug na-paddle kini sulod sa 80 ka bunal sa nilabay nga tuig ug karon lang niya nasayran dihang gipatawag sila sa tunghaan.

Usa sa iyang kabalaka nga atngan ang iyang anak ilabi na nga nibutyag kini kung kinsa ang iyang mga kauban hinungdan gusto sab niyang masayran kung kinsa ang nangulo sa pag-recruit sa iyang anak.

Plano sa inahan nga ibalhin na lang niya sa pribadong tunghaan ang iyang anak ilabi na nga nalakip kini sa posibleng ma-kick out sa tunghaan.

Ang kagubot nikatap na sa social media ug napasa-pasa na sa dul-an 120 ka shares.

Apan si Senior Police Officer 3 Henie Astera, imbestigador sa Alcantara Police Station, nitug-an nga fake news ang maong taho ilabi na wala silay natala nga insidente may labot sa giingong karambola o kagubot sa tunghaan.

Dugang ni Astera nga atol sa ilang tigum sa mga magtutudlo sa tunghaan, ilang sutaon ug ilhon kung kinsa ang nag-post sa maong taho tungod kay mohimo og aksyon ang mga opisyal sa eskwelahan.

Gibutyag ni Astera nga sa ilang pagsubay sa maong tunghaan, aduna silay nahibaw-an nga tulo ka grupo sa mga gangsters nga naglangkub sa Kamandag, Mangtas ug Pulang Araw diin kasagaran mga menor de edad ang sakop.

Gitug-an ni Astera nga kung adunay mga ginikanan nga modangop sa ilang buhatan nga biktima ang ilang mga anak sa paddle sa mga gangster, andam sila moabag niini.

Ang guidance counselor sa Alcantara National High School nga si Jeny Borja nitug-an nga fake news ang nikatap sa social media.

Sumala pa ni Borja nga mohimo sila og lakang sa nag-post niini samtang padayon pa ang ilang imbestigasyon. (/GMR)(BANAT NEWS)