SPO1 Dumpit gilubong na

CEBU, Philippines – Nipabuhagay sa ilang kahiubos ang pamilya ni SPO1 Adonis Dumpit sa Philippine National Police nga sa pipila ka tuig nga panerbisyo niini wala gyud siya hatagi og police honors atol sa lubong niini kagahapon.

“Pila ka tuig niyang serbisyo? Manguli mig Mindanao ang kahiubos among dala,” sigun sa usa sa iyang kabanay nga dili magpahingalan.

Dungan sa pagbunok sa uwan ang luha sa mga higala ug nailong pamilya ni Adonis ilabi na sa iyang mga gipang-amuma nga mga bata nga nihatud kaniya sa iyang lubnganan.

Matud sa maguwang ni Adonis, Alaric Dumpit, nga dili na sila maghandum nga matabangan pa sila sa Commission on Human Rights aron mapamatud-an nga dili lehitimo ang operasyon sa National Bureau of Investigations ug Police Regional Office-7.

Samtang si Cebu City Mayor Tomas Osmeña nagkanayon nga bisan pa man og nipanaw na ang iyang paboritong polis, modapig gihapon siya niini.

“We don’t have to say anything. He knows I will always standby him in life and in death,” si Osmeña niingon.

Ang asawa sa mayor, Konsehal Margot Osmeña, nihatag og wala matino nga kantidad  nga  cash assistance kang Josephine Gabaya, kanhi asawa ni Dumpit.

Samtang walay nasigpatang mga unipormadong mga higalang polis ni Dumpit sa paghatud niini nunot sa bahad ni Police Regional Office-7 director, Chief Supt. Debold Sinas, nga ipaubos sa background investigation ang mga masigpatan nga mga polis.

Ang Cebu Gun Owners Club hinoon nagbilin og 20 ka kabhang sa bala sa lubong ni Dumpit sanglit ila kining tradisyon kung may mamatay nga kauban.

Si Konsehal Dave Tumulak, deputy mayor for police matters, nitug-an nga mag-agad sila sa pamilya ni Dumpit kung mosang-at og reklamo ug ang kagamhanan  sa siyudad andam motabang.

Gitug-an ni Tumulak nga sa pagkakaron wala pa nangayo og security escort ang pamilya ni Dumpit tungod ilang gibarugan nga walay sala ang polis. (Rowena D. Capistrano/GMR)(BANAT NEWS)