Mga batang nagduwa’g posporo maoy nakasunog

CEBU, Philippines – Moabot 38 ka mga panimalay ang naugdaw atol sa sunog nga niulbo sa may Cabahug Street, Barangay Opao, Mandaue City sa miaging adlaw. Sumala pa sa kabomberohan ang sunog nagsugod sa panimalay ni Jimmy Baunsit kinsa wala diha sa ilaha atol sa hitabo.

Matud pa ni Senior Fire Officer 1 Noel Codilla, Fire Investigator sa Mandaue City, base sa ilang inisyal nga imbestigasyon mga batang nagduwa og posporo maoy hinungdan sa sunog ug swerte nga walay mga nakalas o naangol. Dugang pa ni Codilla, giisa nila ngadto sa Task Force Alpha ang alarma tungod sa kahagip-ot sa lugar ug walay fire hydrant sa duol ug hinay ang pressure sa tubig. Gibana-bana moabot ngadto sa P900 mil ang danyos sa maong sunog. (Romeo Limpangog/IBM)(BANAT NEWS)