Patrol car giilog sa hubog
CEBU, Philippines — Patrol car sa Special Weapons and Tactics sa Naga Police Station giilog ug gimaneho padung sa laing lugar sa usa ka lalaking hubog.
Tungod niini, gimando ni Cebu Provincial Police Office director Senior Supt. Manuel Javier Abrugena ang paghimo og imbestigasyon aron masuta kon kinsay angay manubag.
“Ang nakita po kasi natin eh, dalawang PNP personnel lang ang nag-respond na supposed to be one team. When I say one team it should be at least seven to 10 personnel,” butyag ni Abrugena.
Niadtong Domingo sa gabii miresponde ang maong duha ka polis sa usa ka alarma bahin sa hubog nga si Recarti Cantano, 25, sa Barangay Lutac.
Ilang gikarga si Cantano sa luyo apan giingong nagsige gihapon kini og wild sa likod. Nabalaka silang basin matagak mao nga mihunong sila aron kini ipabalhin sa atubangan.
Apan sa komosyon nailog hinuon sa maong suspetsado ang patrol car ug gibiyaan ang duha ka polis. Nakita pagbalik ang patrol car didto na sa Barangay West Poblacion apan wala na si Cantano.
Samtang nagdagan ang imbestigasyon giparelibohan ang duha ka polis ug gidala sa admin holding unit sa CPPO. (BANAT NEWS)
- Latest
