Satellite police station gipaguba
CEBU, Philippines — Gimando sa Siyudad sa Sugbo nga demolison ang tukoron nga satellite office sa Police Station 7 diha sa Barangay Inayawan tungod wala kini building permit.
Niadtong Hunyo 5, 2018, si Mayor Tomas Osmeña mimando sa Prevention, Restoration, Order, Beautification, and Enhancement (PROBE) team nga tangtangon ang ‘illegal structures’ sa maong dapit.
Ang pangulo sa PROBE nga si Racquel Arce miingon sa Banat News nga ilaha ng gi-serve ang order ug boluntaryo ng gitangtang ang mga estraktura niadtong Hunyo 25.
Si Office of the Building Official head Josefa Ylanan nisaysay nga walay building permit ang maong proyekto ug adunay mireklamo kay nakaali kini sa agianan.
Sa wala pa ang clearing order sa mayor, ang Department of Engineering and Public Works niisyu na og notice of illegal construction sa kontraktor ug gimandoan sa pagkuha og building permit.
Ang Police Regional Office 7 regional engineering pinaagi ni Police Superintendent Edgar Diamos mipadala og suwat ngadto ni Ylanan nga nipasabot nga wala pa gyud sila makasugod og tukod kay nagproseso pa sila sa building permit. Gidugang usab ni Diamos nga sa dihang mibisita sila sa OBO gisultihan sila nga ang luna nga tukoran sa satellite office kay apektado sa road widening sa F. Jaca Street.
Apan si Konsehal Joel Garganera, chairman sa Police Advisory Council, misaway sa mando sa mayor kay dako og matabang sa peace and order sa lugar ang presensya sa maong opisina sa mga polis. Gikwestiyon usab niya ang termino sa OBO nga “illegal construction” kay sa pagkatinuod wala pa may gitukod nga estraktura sa lugar.
Dugang pa ni Garganera nga wala usab sila nakakita sa giingong reklamo sa usa ka Nenita Abangan bahin niini.
Apan si Osmeña mipadaplin lang sa komento ni Garganera kay gitahas na niya kini kang Konsehal Dave Tumulak kinsa mao ang iyang deputy mayor over police matters.
Si Tumulak miingon nga kinahanglang kompletohon gyud ang mga dokumento ug kinahanglang may konsultasyon gyud sa mga molupyo ang proyekto. (BANAT NEWS)
- Latest
