Curfew ordinance gihingusgan sa Consolacion

CEBU, Philippines – Gihingusgan sa kapolisan sa Lungsod sa Consolacion ang pagpatuman sa mga ordinansa tumong sa paghatag og kaayuhan sa mga menor de edad nga naglakip sa curfew ordinance.

Si Police Officer 2 Saturnino Inoc niingon nga ang curfew ordinance ang higpit nilang gipatuman.

Nunot niining maong tinguha naumol ang pagpinirmahay og joint covenant o hiniusang kasabutan tali sa kapolisan, mga opisyal sa barangay ug lungsod ingon man sa mga ginikanan.

Motabang sa pagpatuman sa ordinansa ang mga barangay tanod.

Matud ni Inoc nga tungod sa gihingusgan nilang pagpatuman sa curfew ordinance maoy ilang na-rescue ang 23 ka menor de edad nga naaktohan nga naglaroylaroy bisan lawom na ang kagabhion sa Barangay Nangka, Cansaga, Poblacion Oriental, Tayud, Casili ug uban pa.

Ang mga menor de edad nga na-rescue gipanghatud ngadto sa ilang ginikanan. (/GMR)(BANAT NEWS)